Liverpool ayaa safar ku tagtay
waddanka Talyaaniga oo ay ciyaarta ugu dambaysa wareegga koowaad ee Group-yada
Champions League ay AC Milan kula soo ciyaari doonaan.
Reds ayaa waqti hore u gudubtay wareegga 16ka iyadoo xaqiijisatay kaalinta
koowaad ee Group B, waxaana muuqata in Jurgen Klopp uu samaynayo
isbeddello waaweyn caawa isaga oo liiskiisa ka reebay dhawr laacib oo muhiim
ah.
Ciyaartii hore ee labadan kooxood, waxa 3-2 ku badisay Liverpool, hase
yeeshee AC Milan ayaa haddii ay guuleysato waxay usoo bixi kartaa wareegga 16ka
inkasta oo ay u baahan yihiin in FC Porto laga badiyo.
Difaaca reer Netherlands ee Virgil van Dijk iyo kabtan Jordan Henderson
ayaa ka maqan liiska ciyaartoyda Liverpool ee u safray Talyaaniga, hase yeeshee
waxa dib ugu soo laabtay labada ciyaartoy ee Joe Gomez iyo Naby Keita oo kasoo
kabtay dhaawacyo ay muddo ku maqnaayeen.
Weeraryahanka reer Portugal ee Diogo Jota ayaa isaguna dhaawac ku seegaya
ciyaartan, taas oo ka dhigan in Divock Origi uu kusoo bilaaban doono afka hore
maadaama uu sidoo kale maqan yahay Roberto Firmino.
Mohamed Salah iyo Sadio Mane ayaa ugu yaraan uu midkood kusoo bilaaban
doonaa weerarka, halka laacibiinta da’da yar ee Tyler Morton, Harvey Davies,
Conor Bradley iyo Elijah Dixon-Bonner ay sugayaan inay fursad ka helaan
ciyaarta caawa.
0 Comments