Dad badan oo ku nool Galbeedka Kenya ayaa isugu tagay oo dilay ninkii
qirtay in uu carruurta dili jiray ka dibna dhiiggooda cabi jiray. Ninkaas ayaa
laba maalmood ka hor ka baxsaday saldhig boolis oo ku yaalla Nairobi.
Masten Wanjala, oo 20 sano jir ahaa, waxaa dabagalay dad ku nool magaalada
Bungoma, isagoo ku dhuumanayay guri, ka dib garaacid ayey nafta uga qaadeen,
sida ay sheegeen.
Ka dib markii uu saldhigga ka baxsaday, booliska Kenya waxay billaabeen
howlgal ballaaran oo lagu raadinayay ninkan qirtay in uu dilay 10 canug, shan
sano gudahood.
Wuxuu qirtay in mararka qaar uu dhulka ku jiidi jiray, dhiiggoodana cabi
jiray.
Waxaa la sheegay in uu dib ugu noqday guriga waalidiintiisa - kuwaas oo
iska deyriyay ka dib markii dembiga uu galay - waxaana ceeji iyo garaacid ku
dilay dadkii deriska oo bannaanka ku arkay, kuwaas oo u raacay illaa gurigii uu
ku dhuumanayay, sida ay sheegeen dad goobjoogeyaal ah oo la hadlay wargeyska
The Standard.
Wuxuu isku deyay in aysan ka shakinin dadka deegaanka, wuxuuna ku
dhuumanayay guri aan ka fogeyn midka waalidkiisa, sida uu wargeyska ka soo
xigtay taliyaha booliska ee magaalada Bungoma.
Waxaa loo maleynayaa in waalidkiisa ay garteen maydkiisa, balse afhayeen u
hadlay booliska ayaa sheegay in weli ay baarayaan si ay u xaqiijiyaan in
Wanjala uu dhintay, sidaas waxaa qortay wakaaladda wararka ee Reuters.
"Ma garan karno sida ay ugu suuragashay in uu u kala safro Nairobi iyo
illaa tuuladii uu ku dhashay," ayuu yiri Musyoki Mutungi.
"Dadka deegaanka oo aad u feejignaa ayaa marka hore gartay oo ka dibna
u baxay in ay dilaan ka hor intaan boolisku ogaanin."
Wanjala wuxuu carruurta iskaga dhigi jiray tababare dhanka ciyaaraha ah, ka
dib ayuu u kexeysan jiray meel cidlo ah oo uu ku dili jiray.
Ka dib markii la xiray bishii July, wuxuu booliska geeyay meelo kala duwan
oo carruurta uu ku aasay, waxaana laga soo helay maydad dhowr ah.
Dilka wuxuu ka geystay Nairobi, iyo qeybo ka mid ah Bariga iyo Galbeedka
Kenya.
Seddax askeri oo shaqada ku jiray markii uu ka baxsanayay xabsiga ayaa la
horgeeyay maxkamad, waxaana looga shakisan yahay in ay ka caawiyeen baxsashada
iyo in ay feejignaan la'aan ahaayeen.
Booliska waxay sheegeen in maqnaashihiisa la dareemay subixii, xilligii
toosinta maxaabiista.
Farriimo badan oo Twitter-ka ay soo dhigtay Laanta Dembi Baarista Kenya,
waxay ku sheegtay in ay ka shalayneyso in Wanjala uusan cadaaladda wajihin.
Waxaa mid ka mid ah farriimaha ku xusan: "Xeerka duurka oo ay fuliyeen
dad careysan ayaa guuleystay".
Waxaa sare u sii kacaya dadka dalbanaya in taliyaha booliska Kenya uu is
casilo ka dib baxsashada ninkaas oo lala yaabay.
0 Comments